Bestfriend/Boyfriend? (Part 1/2) From: LagunaBatangasBi

 

Bestfriend/Boyfriend? (Part 1/2)

From: LagunaBatangasBi

 

“Matagal ka pa ba diyan Marco?”

“Saglit na lang ‘to. Minsan lang to mangyayari kaya dapat gwapo ako.”

“Ikaw pa ngayon nagpapahintay sakin. Lagi ka namang gwapo.”

“Patience, Anthony. Syempre dapat gwapo ako for you.”

Nilapitan ako ni Anthony at niyakap. “Okay na. Tayo na, naghihintay na sila sa labas.”

-----o0o-----

Five years ago…

 

“May ginagawa ka?”

Tumawag sakin si Anthony. Mukhang may problema na naman ‘tong lokong ‘to.

“Saan?”

“Dun sa dati.”

High school pa lang, magkaibigan na kami ni Anthony. Classmates kami simula first year. Dati ay marami kami sa barkada pero mula ng mag-kolehiyo kami ay nabawasan.

Pareho kami ng pinasukang school sa college, kaya mas naging close kami. Ngayon ngang second year college students na kami, lalo pang tumibay at mas lumalim pagsasamahan namin. Usually pag tumatawag iyan sa disoras ng gabi at gusto makipagkita, may problema yan. Sanay na kong bigla na lang siyang tatawag at mapipilitan naman akong iwan kung anuman ang ginagawa ko para puntahan siya.

Nandun na si Anthony sa lugar kung saan kami madalas magkita, nakasandal sa puno. “Anong problema?” tanong ko pagdating ko.

“Nakipagbreak siya sa akin,” mahinang tugon ni Anthony.

“Sino?”

“Sino pa ba? Para namang ang dami kong girlfriend. Marco naman eh. Inaasar mo pa ako,” mangiyak-ngiyak na sagot ni Anthony.

Inakbayan ko siya at tinapik ang balikat. “Ito naman, pinapatawa lang kita. Ikukwento mo ba?”

“Masyado daw akong maloko. Parang hindi ko daw kayang magbago para sa kanya. Feeling niya hindi ako nag-aaral ng mabuti at walang plano sa buhay.”

“Pinaliwanag mo ba side mo?”

“Para saan pa? Eh ayun na ang tingin niya sa akin. Ang nakakainis lang, nakilala na niya akong ganito tapos ngayon bigla siyang magrereklamo.”

“Pano yan? Hindi ka na makikipagbalikan?”

“Alam mo namang hindi ako nakikipagbalikan kapag alam kong wala naman akong ginagawang masama.”

Hindi na ko sumagot pa at tumabi na lamang sa kanya. Humiga siya sa balikat ko at nagsalita ng marahan. “Mukhang ikaw na naman ang mag-aalaga at magtitiyaga sa ‘kin. Unless hanapan mo agad ako ng bagong girlfriend.”

Medyo ngumiti siya habang nagsasalita.“May choice pa ba ko?

“Eh kung tayo na lang kaya?” – si Anthony.

Tumayo si Anthony mula sa pagkakahiga niya sa balikat ko at humarap sa akin. “Gago ka, sinabi nang huwag kang magloloko ng ganyan eh, papatulan kita,” naiinis kong sabi sabay palo sa braso niya.

“Joke lang. Hoy ikaw Marco, subukan mo kong iwan, ipagkakalat ko sa campus na bading ka.”

“As if naman hindi pa nila lahat alam. Kulang na nga lang sumali ako ng beauty contest para may proof na bading ako,” natatawa kong sabi.

“Pag sumali ka dun, promise ako escort mo kahit ano mangyari.”

“Natouch naman daw ako dun. Ano malungkot ka pa ba?”

“Syempre naman. Pero ayoko ng magdwell dun. Dito tayo matulog,” sabi ni Anthony sabay higa sa damuhan.

“Baliw ka ba? Gusto mong mamatay tayo sa kagat ng lamok?”

“Syempre prepared ako. May dala akong kumot at Off.”

“Prepared ka nga. Eh hello may pasok ako bukas. Tsaka may tinatapos akong paper kanina nang bigla mo kong pinapunta dito.”

“Sa inyo na lang kaya ako matulog? Wala naman akong pasok bukas eh. Buong araw lang ako hihiga sa kama mo.”

“Bahala ka.”

Sumakay na kami sa kotse ko para bumalik sa bahay. Nag drive-thru muna kami sa Jollibee dahil hindi pa pala siya kumakain ng dinner. Pagdating namin sa bahay ay pumasok na agad si Anthony sa loob. Nadatnan niya doon si Mama na nanood ng TV. Hinalikan niya si Mama sa pisngi at umupo sa tabi nito at nanood din ng TV. Ganyan na ka-close si Anthony at si Mama. High school pa lang kasi madalas na siya dito sa bahay. Parang anak na ang turing ni Mama kay Anthony.

“Mama, dito daw matutulog si Anthony,” sabi ko kay Mama matapos ko siyang halikan sa pisngi.

“Oh ok sige. Ayusin ko ba yung guest room?”

“Ay hindi na po Tita. Dun na lang ako sa room ni Marco matutulog,” sagot ni Anthony.

“Sige ikaw bahala.”

Umakyat na kami ni Athony sa kwarto ko. Umupo siya sa computer chair ko at binuksan ang laptop ko. Dumiretso naman ako sa closet at kumuha ng pamalit kong damit. Kinuhanan ko na din ng damit si Anthony at ibinato ito sa kanya. Nagpalit na ko ng damit sa kwarto.

Nagpalit na rin ng damit si Anthony. Gwapong-gwapo ako dito kay Anthony. Sobrang amo ng mukha nya at ang pupungay ng mata. Medyo payat lang siya pero hindi naman pangit tingnan. Kung hindi ko lang talaga ‘to kaibigan matagal ko na ‘tong pinatulan.

“Anthony may tanong ako sayo? Bakit parang sobrang komportable kang magbihis sa harapan ko eh alam mo namang bading ako?”

“Kasi kaibigan kita. Alam kong wala kang gagawing masama. Tsaka alam ko namang hindi rin ako bibigay sayo,” natatawang sabi ni Anthony.

“Ang yabang mo. Bakit, hindi ba ako gwapo?” naiinis kong tanong.

“Gwapo din naman. Pero ‘di kasing gwapo ko,” natatawa niyang sagot.

“Ewan ko sayo. Umalis ka na nga dyan sa computer chair ko, tatapusin ko na yung paper ko. Dun ka sa kama.”

Umupo ako sa upuan at binuksan ang file na kelangan kong tapusin. Niyakap ako ni Anthony mula sa likod. “Uy nagtatampo si Marco ko. Sorry na.”

“Oo na. Dun ka na sa kama. Huwag mo ko istorbohin ah. Kelangan ko ‘to matapos ngayong gabi.”

“Opo.”

Humiga sa kama si Anthony at pinatugtog ang MP3 player ko. Puro lang mga kanta ni John Mayer ang nandun.“Adik ka talaga sa kanya ‘no?” tanong ni Anthony.

“Gusto ko lang talaga mga kanta niya.”

“So manonood ka ng concert niya sa October?”

“Hindi, ang mahal ng ticket eh,” sagot ko.

-----o0o-----

Alas dos na ng madaling araw ko natapos ang ginagawa ko. Kanina pa nakatulog si Anthony. Nag-print na ko ng paper ko tapos ay pinatay ang laptop. Pinatay ko na rin ang ilaw at tumabi kay Anthony. Nakatagilid kami pero sa parehong side kami nakaharap.

Niyakap ako ni Anthony. “Good night best friend.”

“Kala ko tulog ka na?” tanong ko.

“Nakatulog na nga ako pero nagising lang.”

“O sige. Good night na.” Paano ba naman ako hindi magkakagusto dito eh sobrang sweet sa akin. Hindi siya naaalangang yakapin o tumabi sa akin. Sobrang bait pa. Hay mahal ko na ata talaga tong mokong na ‘to. Pero alam ko namang imposible.

Gumising ako ng 6 am para maghanda sa pagpasok. Kumain na ako ng breakfast tapos ay naligo at nagbihis. Mga 7:15 ako umalis pero tulog pa rin si Anthony. Hindi ko na siya ginising dahil alam ko namang madadatnan ko siya pag-uwi ko.

Pagpasok ko ng classroom ay nadatnan kong andun si Sarah, ex-girlfriend ni Anthony.

“Marco nakita mo ba si Anthony?” tanong sa akin ni Sarah.

“Wala siyang pasok ngayon.”

“Alam ko ngang walang pasok kaya nga tinatanong ko kung nakita mo eh,” masungit niyang tugon.

Hindi talaga kami magkasundo nito. Mula pa ng maging sila ni Anthony, bihira ako sumama sa kanila dahil hindi ko talaga gusto ugali niya. Maganda nga siya at matalino pero ang pangit talaga niya umasta.

“Hindi,” maikli kong sagot. Tinext ko si Anthony tungkol dito.

Ako:           Huy hinahanap ka ng ex mo.

Anthony:    Sino sa kanila?

Ako:           Edi yung pinakabago.

Anthony:    Ano sabi mo?

Ako:           Sabi ko hindi kita nakita.

Anthony:    Sige. Text ko na lang siya.

Ako:           Makikipagbalikan ka?

Anthony:    Oo eh. Mahal ko pala talaga siya.

Ako:           Ewan ko sayo. Pinuyat mo pa ko kagabi tapos ganyan lang din pala.

Anthony:    Sorry na. Nga pala, alis na ako maya-maya dito sa inyo ah. Makipagkita ako kay Sarah.

Ako:           Ok.

Hindi naging maganda ang takbo ng araw ako dahil sa text na iyon ni Anthony. Medyo nasaktan ako at nagselos. Pakiramdam ko kasi kapag kami ang nag-away, hindi siya gagawa ng paraan para magkaayos kami.

Pag-uwi ko ng bahay ay hindi ko na nadatnan si Anthony tulad nga ng sinabi niya. Binato ko ang gamit ko sa sahig at humiga sa kama. Kinuha ko ang MP3 player ko at pinatugtog ito. Nagulat ako ng may isang kanta roon ni John Mayer pero cover lang. Mukhang walang nagawa si Anthony kanina sa bahay kaya nagrecord ng kanta. Natawa ako dahil wala siya sa tono.

Nagtext ako sa kanya para asarin siya.

Ako:           Hoy Anthony, binaboy mo na naman MP3 player ko. Kung anu-ano pinaglalalagay mo. Tsaka nabastos si John Mayer sa ginawa mo.

Hindi sumagot si Anthony. Siguro ay magkasama sila ni Sarah kaya ayaw niyang magpaistorbo. Hindi ko namalayan na nakatulog na pala ako. Nagising lang ako ng tinawag na ko ni Mama para maghapunan. Nang tiningnan ko yung phone ko, wala pa ring text si Anthony. Medyo nalungkot ako. Hindi ko alam. Dapat natuwa ako na makikipagbalikan siya dahil mahal naman talaga niya si Sarah, pero hindi ko maiwasan malungkot dahil may gusto nga ako sa kanya.

Habang kumakain ay may tinanong sa akin si Mama.

“Anak, kailan mo balak sabihin kay Anthony yang nararamdaman mo?”

Nagulat ako sa tanong ni Mama. Alam niyang noon pang high school ako may gusto kay Anthony.

“Never na mama. Ayokong masira pagkakaibigan namin. Tsaka alam kong imposible namang ganun din ang nararamdaman niya. Mawawala din tong nararamdaman ko.”

“Ayoko lang naman anak na nakikita kang nasasaktan.”

“Hayaan niyo na Mama. Mawawala din ‘to.”

-----o0o-----

Kinabukasan, sa school ay nagkasalubong kami ni Anthony.

“Marco sorry hindi ako nakapagreply sa ‘yo kagabi. Kasama ko kasi si Sarah nun.”

“Ok lang. Kamusta na nga pala kayo?”

“Ayun nagkita kami sa isang restaurant. Sinubukan ko siyang kausapin pero may gusto siyang gawin ko na hindi ko kayang gawin,” tugon niya.

“Ano yon?”

“Wala. I guess I just have to move on. Alam mo, honestly, she does not deserve me. And if she cannot accept every aspect of who I am, then she does not deserve my love,” madamdamin niyang sagot.

“Wow ang lalim Anthony, ah. Sana nga makapag move on ka na talaga. Marami pa namang girls na nagkakandarapa sa ‘yo eh,” sagot ko sa kanya.

Hindi na muna ako maghahanap. Kelangan ko muna maglet go kay Sarah. Syempre kahit ganun yun, mahal ko pa rin yun. Teka, san ka punta? Kakain ako sa labas. Itetext pa lang sana kita”

“Sa library, may ireresearch lang. Sunod na lang ako sa’yo, saglit lang naman ako eh.”

“Samahan na lang muna kita. Wala din naman na akong gagawin.”

Tinulungan ako ni Anthony magresearch tungkol sa Communication theory subject ko. Nakaupo kami sa isang table ng lumapit ang isa kong classmate.

“Marco, may nahanap ako tungkol dun sa assignment natin. If you want, ipa-photocopy mo na lang,” sabi niya.

“Sige. Salamat. Siya nga pala, Anne, best friend ko pala si Anthony. Anthony, classmate ko, si Anne.”

Nagshake hands sina Anne at Anthony. Nahalata kong medyo namula si Anne. Mukhang crush niya ang best friend ko. Tumayo na kami ni Anthony at pumunta sa photocopying area. Nang makuha na namin yung readings namin ay inaya na ako ni Anthony kumain.

“Anne, do you want to join us? Kakain kami ni Marco diyan lang sa labas ng school,” paanyaya ni Anthony kay Anne.

“Uhm, sige next time na lang. May kailangan pa kasi akong gawin eh. Thanks, though,” sagot ni Anne.

“Oh okay. Sige nice meeting you.”

“Nice meeting you too.”

Lumabas na kami ni Anthony at dumiretso sa fishball stand. Favorite snack kasi namin ni Anthony ang fishballs. Simple joys in life kumbaga.

“Anthony, libre ko na to total naman sinamahan mo ko sa library tsaka alam kong broken hearted ka pa,” pang-aasar ko sa kanya.

“Alam mo hindi ako maaasar sa iyo dahil ililibre mo naman ako,” natatawa niyang sagot.

“Ano naman tingin mo kay Anne?” tanong ko kay Anthony.

“Well, ok lang. Mukhang smart. Pero she’s too simple for my type.”

“Hindi ko naman tinatanong kung type mo siya,” pang-aasar ko. “Just sayin’.”

Pag-uwi ko ng bahay ay nakatanggap ako ng text mula kay Anne.

Anne:         Marco, hindi ko alam na friend mo pala si Anthony. Naging classmate ko siya before at super crush ko siya. Alam kong hindi niya ako maalala. Wala lang, natuwa lang ako na may common friend kami.

Ako:           Napansin ko nga kanina na namula ko nung pinakilala kita sa kanya. Well, marami talagang nagkaka-crush dun. Pero playboy yun. Ingat ka lang. Haha

Anne:         Alam ko namang hindi ako magugustuhan nun. Ikaw ba Marco, wala ka bang gusto kay Anthony? Super close kayo eh. At mukhang hindi siya nahihiyang kasama ka.

Ako:           Ako magkakacrush dun? Alam ko lahat ng baho nun. Magkaibigan na kasi kami since high school kaya sanay na siyang kasama ako. Ganyan ang buhay namin ni Anthony. Normal kung ikukumpara sa iba. Magkaiba kami ng course kaya wala kaming parehong subjects. Nagkikita lang kami pag free time namin or kapag nagka-cut ng classes ang isa sa amin para tumambay or mag-sit-in sa class ng isa.

Unti-unti na ring nakalimutan ni Anthony si Sarah. Mas nag-focus siya sa pag-aaral niya. Ako naman ay ganun din dahil iniingatan ako ang grade average ko para naman magka-honor ako sa graduation.

-----o0o-----

October na. Buwan na ng birthday ko. Si Anthony naman ay December ang birthday. Hindi namin nakasanayan na magregalo sa isa’t isa. Madalas ay nanlilibre lang kami kasama ng iba pa naming high school friends.

Isang araw habang kumakain kami nina Anthony at Anne sa may fishball stand sa labas ng school ay may inabot sa akin si Anthony.

“Uy Marco, ito na pala birthday gift ko sa ‘yo. Ang tagal kong pinag-ipunan yan ah,”

inabot ni Anthony sa akin ang isang envelope.

“Wow, first time mo magregalo sa akin ah. Mukhang mapipilitan akong bigyan ka din ng regalo sa birthday mo,” sagot ko.

“Aba dapat lang ano.”

“Dali Marco buksan mo na,” pangungulit ni Anne.

Medyo madalas na din naming makasama si Anne dahil naging magpartners kami sa final project namin. Binuksan ko na yung envelop at nagulat ako sa laman. Dalawang VIP tickets sa concert ni John Mayer dito sa Manila.

“Oh my God Anthony, pano mo nabili ‘to? Ang mahal nito ah.” Nakatitig lang ako sa ticket habang nagsasalita.

“Siyempre humingi ako ng extra allowance sa parents ko para makaipon. Tsaka binenta ko din yung comics collection ko.”

“Binenta mo yun? Eh ‘di ba bata ka pa lang kinokolekta mo na yun?” gulat kong tanong.

Adik si Anthony sa Spiderman comics at talagang kinukulit pa niya ang Tita niya sa Amerika para lang padalhan siya ng mga issues nito. Hindi ako makapaniwalang binenta niya yun para lang mabilhan ako ng tickets.”

“Sa pinsan ko lang naman din binenta para sigurado akong maiingatan niya tsaka at least pwede ko pa ring hiramin every now and then. Alam ko kasing crush na crush mo si John Mayer kaya ko naisipang bilhan ka since minsan lang naman siya magconcert dito. ”

’Di ko napigilan ang aking sarili at niyakap ko si Anthony sa harap ng maraming tao. “Thank you so much Anthony.”

“Sus, wala yun. Best friend kita eh. Pero teka kapag nagtagal pa tayong magkayakap dito baka isipin nila ikaw na bago kong girlfriend,” natatawa niyang sabi.

Si Anne naman ay nakatingin lang sa amin. Inalis ko ang pagkakayakap ko sa kanya at pinalo siya sa braso. “Gago ka. Wala naman yung malisya.”

“Syempre sa ating dalawa wala yung malisya. Pero alam mo naman yung ibang tao, mga tsismosa. Sa gwapo kong ‘to, malamang mabilis kakalat ang balita,” natatawa niyang sabi.

“Sabagay. Pero bakit dalawa?”

“Syempre kasama mo ako. Baka mabore ka kapag ikaw lang mag-isa.”

“Salamat talaga.”

-----o0o-----

Ilang araw din kaming hindi nagkakasama ni Anthony dahil finals week na. Tinatapos na namin ni Anne ang project naman at marami din akong ginagawang papers samantalang si Anthony naman ay busy sa exams niya.

Araw na ng concert. Sobrang excited ako dahil fan talaga ako ni John Mayer, tapos kasama ko pa si Anthony manood. Buti na lang at weekend ang concert at wala kaming pasok pareho. Seven p.m. ang start ng concert pero napag-usapan namin dati ni Anthony na magkita na sa mall ng mga 4 p.m. para gumala muna ng kaunti.

Nasa mall na ako kung saan gaganapin ang concert ng tawagan ako ni Anthony.

“Hey Marco.”

“Uy nasan ka na? Andito na ko.”

“I’m sorry pero hindi kita masasamahan tonight. May bigla kasi akong kelangan gawin eh.”

 

 

>>>>>Itutuloy<<<<<