Kababata (Part 5) - Caught in The Act

 

Kababata (Part 5)

Caught in The Act

 

John Mark

Magkapit-bahay lang pala kami ni Jonas. Mabait naman pala ang loko at isinakay pa ako sa kanyang kotse nang makita akong naglalakad. Sa konting sandali na nagkausap kami ay parang close na kami kaagad.

Ngayon nga ay magkasabay pa kaming pumasok dahil sa isinabay niya uli ako. Pagpasok namin ng room ay pinagtinginan kami ng mga kaklase namin, nahawa na yata ako sa kasikatan nitong si Jonas. Ang loko, bumati pa.

“Good morning classmates!” bati ni Jonas na nakangiti. Nag good morning din naman ang mga kaklase namin, pati mga lalaki. “Pa good vibes lang guys hahaha.” Sabi pa niya.

Dumiretso na ako sa dati kong inupuan, naroon na si Allysa. Sa tabi ko naupo si Jonas.

“Allysa, wala pang umookopa sa katabing upuan ko ano, gusto raw ni Jonas na dito na rin sa likod maupo,” sabi ko kay Allysa.

“Wala, wala pa naman tayong permanent seat arrangement eh. Magkaibigan na kayo? Nice naman, parehong gwapo ang magiging seatmate ko hehehe,” wika ni Allysa.

“Siya lang ang gwapo, hindi ako kasale. Hindi ba magkakaibigan tayo? Tapos, alam mo ba na magkapit-bahay pala kami. Doon din pala siya nakatira sa village na tinitirhan ko.” Wika ko.

“Talaga? Tingnan mo nga naman ano? Ngayon mo lang nalaman?”

“Hindi naman ako taga-roon, sa isla nga ako hindi ba. Yung sponsor ko ang doon nakatira.”

“Alam mo Allysa, nagpapanggap lang taga-isla yang kaibigan natin. Actually, ang ganda-ganda ng bahay nila ang laki-laki pa, parang mansion.”

“Haay nako, huwag kang maniwala diyan. Patingin nga ng kamay mo,” sabi ko kay Jonas na pinakita naman. “Allysa, haplosin mo ang kamay ko at kamay niya, kaninong kamay ang sa mayaman?”

“Ito naman, nagbibiro lang, baka mag-away tayo kaagad eh kapagkakaibigan lang natin,” wika ni Jonas.

“Ssshhhh, nariyan na si Sir.” Sabi ni Allysa.

-----o0o-----

Naging magkaibigan kaming tatlo, masasabi ko nang close friend kami dahil kami palagi ang magkakasama, sa pagkain, sa gimikan. Palagi rin kami ang magka-grupo sa tuwing may group assignment o project kami. Pero mas close na kami ni Jonas dahil sa palagi kaming magkasabay na pumasok sa klase, pati na pag-uwi ng bahay.

Hindi ko na inisip na siya din si Jonas na aking kababata kahit na pa may konti silang similarity kahit na sa pag-uugali. Unang-una, iba ang apelyido niya, pangalawa, kwento niya ay sa Manila siya ipinanganak at lumaki, kaya walang posibilidad na siya nga si Jonas.

Naging masaya ang mga sumunod na araw sa aming tatlo. Minsan ay isinasama kami ni Jonas para panoorin siya kapag may sinalihan siyang fashion show. Maging sa mga shoot niya para sa kanyang social media account ay isinasama kami. Very supportive na kaibigan niya kami.

Mabilis na nagdaan ang mga araw, second sem na namin. Dito na nagsimula ang medyo pagdalang ng aming pagsasama. Naging busy siya lately sa pagmo-model at pag-gawa ng commercial Ad, bukod pa sa pag-gawa ng content para sa kanyang social media account.

Isa pang kina-bisihan niya ay may nililigawan na siyang isang babae sa ibang department.

Sa pagkain ay palagi na sila nung babae ang magkasabay, kaya naman kami na lang ni Allysa ang palaging magkasabay. Kung dati-rati ay sinasabay pa niya ako sa kanyang kotse pag-pasok at pag-uwi, ngayon ay madalang na. Iyon ay kung hindi niya makakasabay ang babae na ipinakilala niya sa amin na si Estella.

Maganda si Estella, hindi kataka-takang maraming magkagusto rito at ligawan, wala pa namang inaamin sa amin si Jonas na sila nang dalawa kahit na pa, palagi silang magkasama.

Nalungkot din naman kami ni Allysa dahil sa nabawasan ng magulo sa aming grupo. Meron namang kaming bagong naka-grupo, si Kent, si Eduard at si Alma, mga bagong kaklase namin nitong second sem, block section pa rin naman kami. Kami na ngayon ang madalas na magkasama sa pagkain, sa pag-aaral at sa pag-malling at ibang lakad.

Sa loob ng klase ay kasama pa rin naman namin siya, pero paglabas ay hindi na.

Habang kumakain kami sa school canteen, ay nakasabay naming kumakain sina Jonas at Estella, sweet na sweet sila. Ano pang aking iisipin, sila na talaga siguro. Kaya lang ay may iba akong naramdaman, para bang nagseselos ako. Syempre, hindi ko naman ipinahahalata iyon sa mga kaibigan ko, pero napansin naman nila ang madalas na pagtingin ko sa dalawa.

“Hoy Mark, bakit panay ang tingin mo sa dalawang iyon, naiinggit ka ba dahil sa may girlfriend na ang kaibigan natin?” tanong ni Allysa.

“Hoy Marites, napatingin lang, naiinggit na! Na miss ko lang yung tao, dati naman na kasama natin siya palagi. Alam mo naman na dati rin na magkasabay kami na pumapasok at umuuwi. Hayun tuloy, ang laki ng nababawas sa aking allowance,” dahilan ko.

“Hayun, na-miss pa kuno, yun pala ay nanghihinayang sa natitipid sa pasahe. Bilisan mo na nga ang pagkain.”

“Mark, ikaw, wala ka bang nagugustuhan? Halimbawa, hindi mo ba type kaming dalawa ni Allysa? Hahaha, joke lang. Hindi Mark. Seryoso, wala ka bang napupusuan sa ating mga kaklase o kahit sino dito sa campus? Ang dami kayang maganda at sexy rito. Gwapo ka naman di hamak sa Jonas na ‘yun.” Wika ni Alma.

“Oo nga, kung kami nitong si Eduard ay kasing-gwapo mo, marahil ay siguro, nagbilang na kami ng mga chicks hehehe,” sabad ni Kent.

“Hoy, kayong dalawa ha, pag-aaral ang ipinunta natin dito, hindi pag-aasawa ha. Alalahanin ninyo na gumagastos ng malaki ang mga magulang ninyo para makapagtapos kayo sa pag-aaral kaya umayos kayo,” sabi ko.

“Opo Father!” sabay na wika nina  Kent at Eduard, sabay tawa na nakaka-asar.

“Alam nyo, mahirap lang kami, mangignisda lang ang aking ama at nagtitinda lang si Nanay sa palengke ng mga huling isad ni Tatay. May dalawa pa akong kapatid na umaasa sa akin na balang araw ay makatapos ako ng pag-aaral at mapag-aral ko din sila. Kaya wala muna sa akin ang ligaw-ligaw na iyan. Kumain na nga lang kayo.”

-----o0o-----

Hindi ko pwedeng aminin sa mga kaibigan ko na parang nainggit talaga ako sa babaeng kasama ni Jonas, tila selos na ngang masasabi. Naramdaman ko rin iyon noong bata pa kami ng aking kababata, ayoko na mas may malapit pang kaibigan si Jonas kesa sa akin. Kapag nakita kong nakipaglaro siyang una sa ibang bata ay hindi ko siya binabate. Susuyuin naman niya ako. Gustong gusto ko na sinusuyo ako kapag nagalit o nagtampo ako sa kanya.

Pero hindi naman siya si Jonas na kababata ko. Marahil ay sa kadahilanang matagal din naman kaming nagkasama kahit papano.

Isang araw ng Friday ay pinuntahan niya ako sa bahay, wala kaming pasok Friday to Sunday. Natuwa ako dahil sa baka aayain niya ako mag-malling o manood ng sine, pero nagkamali ako, Nakiusap siya sa akin na kung pwede raw na ako na lang daw ang gumawa ng part niya sa aming group assignment dahil sa may date daw sila ni Estella. Dismayado ako, pero dahil kaibigan ko siya ay pinagbigyan ko na siya. Medyo nagalit pa nga sa akin si Allysa dahil sa bakit daw ako pumayag.

“Eh ngayon lang daw naman, saka babawi daw siya sa susunod. Yaan mo na, ngayon lang naman,” sabi ko kay Allysa.

“Bahala ka nga. Kung sabagay, apektado din grades natin kapag hindi natin na-submit on time ang ating assignment. Sa susuod, kapag ganyan na naman,sabihin natin sa prof natin na ibahin na lang ang grouping natin, si Alma o si Kent o si Eduard na lang ang ka-group natin,” naiinis na sabi ni Allysa.

Maging ang iba naming assignment ay kinokopya na lang sa akin ni Jonas. Dumadalas din ang pag-liban niya sa iba naming subject dahil sasamahan daw niya si Estelle, o di kaya ay magkikita sila sa isang lugar o magde-date.

Mabait naman si Estela, pero ang hindi niya alam na dahil sa kapritso niya ay nawawalan na ng time si Jonas na mag-aral.

Minsan ay nagpagawa na naman siya sa aking ng assignment. Para bigyan siya ng leksyon ay hindi ko ginawa at nagdahilan na lang ako ng nakalimutan ko dahil sa maraming akong ginawa.

“Pambihira ka naman JM, parang hindi mo ako kaibigan. Para iyon lang ay kinalimutan mo pa. Paano ako ngayon niyan?” paninisi ni Jonas sa akin.

“Eh, nalimutan ko naman talaga. Marami din akong ginagwa sa bahay, kelangan ko ring mag-aral na mabuti. Alam mo naman pinag-aaral lang ako ng aking sponsor, kelangan ko na maganda ang grades ko. Napapansin ko, hindi ka na gumagawa ng assignment natin, inaasa mo na lang sa akin, at kapag nakalimutan ko ay magagalit ka. Bawasan mo naman ang palaging pag-sundo kay Estella.” Tuloy, ay napagsabihan ko siya na lalo lang niyang ikinagagalit.

“Ano naman ang pakialam mo sa pagbuntot ko kay Estella, personal kong kagustuhan iyon!”

“Nagpapaalala lang ako dahil kaibigan kita, kung ayaw mo mapa-alalahanan eh ikaw ang bahala, buhay mo iyan at wala talaga akong pakialam.”

Nagalit na talaga ako at tinalikuran ko na lang siya.

“Oo, simula ngayon ay huwag mo na akong ituring na kaibigan. Mayabang ka kasi,” wika niya ng malakas na nakakuha ng atensyon sa ibang estudyante. Padabog din siyang umalis na.

-----o0o-----

Simula nga noon ay hindi na niya ako kinibo pa, nadamay pati si Allysa at iba naming kaibigan. Pinaghinalaan pa niya na sila ang nagsusulsol sa akin na huwag nang gawing ang mga assignment niya.

Medyo nagdamdam din talaga ako. Nasayang ang maganda naming pagkakaibigan dahil lang sa isang babae na ewan ko kung syota na niya. Kasi, minsan ay nakita ko siya sa mall na may ibang kasama, at sweet na sweet din sila, magkaholding hands pa habang naglalakad. Nagkasalubong pa kami ni Estella, babatiin ko sana siya ng lumihis siya ng landas, biglang umiba ng direksyon sa paglalakad.

Sinundan ko sila ng tingin. Malayo-layo na ang nilalakad nila ng makita kong sumulpot si Jonas sa dinadaanan nila. Hindi na ako nakakilos dahil parang nagkaroon ng komosyon. Nadinig ko ang malakas na sigaw ni Jonas ng… “Two timer! Cheater! Mag-ingat ka lalaki ka, dahil kung nagawa niya akong pagtaksilan, kaya din niyang gawin sa iyo iyan!” Mabilis na umalis sa lugar na iyon si Jonas.

Nanatili pa rin ako sa aking kinatatayuan, nagulat na lang ako na parang nag-aaway na si Estella at ang kasama niyang lalaki. Maya-maya lang ay iniwan na siya ng lalaki. Sinundan pa ni Estella ang lalaki at hinawakan sa kamay, iwinaksi lang nung lalaki ito at saka naglakag ng mabilis palayo rito dahil pinagtitinginan na sila ng mga tao.

Ewan ko kung bakit nakaramdam ako ng tuwa. Totoong natuwa ako dahil sa baka bumalik siya sa aming grupo at kalimitan na ang taksil na babaeng iyon.

Sa eskwelahan pag pasok ko nung Monday ay balak ko na talagang ikwento kay Allysa ang aking nasaksihan, pero hindi ko ginawa. Nag-alala pa ako na baka isipin niya akong isang lalaking tsismoso, na tama lang sabihin na pakialamero.

Mabuti na lang pala at hindi ko nasabi dahil nung lunch time ay sabay na naman sila at sweet na sweet na naman, parang nagkabati na. Hindi ko alam kung paano sila nagkabati gayong napatunayan na niyang niloloko lang siya ni Estella. Paano kaya naatim ni Jonas na loko-lokohin lang siya ng isang babae.

-----o0o-----

Matindi yata ang galit talaga sa akin ni Jonas, dahil minsan nagkasalubong kami sa CR, palabas ako, papasok naman siya, ay halos banggain niya ako, napaatras talaga ako ng konti habang papalabas at nakita iyon nina Eduard at Kent. Ang siste, hindi man lang siya nagsorry.

“Gago yun ah, bakit hindi ka umalma?” tanong ni Kent at Eduard.

“Hayaan mo na, hindi naman siguro sinasadya ng tao, saka ayaw ko ng away,” sabi ko sa dalawa.

“Hindi siyasadya eh hindi nga nanghingi ng paumanhin. Talagang sinadya niyang banggain ka,” sabi pa nila.

“Tara na, huwag na lang natin intindihin iyon, madamay pa kayo kung galit siya sa akin.

-----o0o-----

 

Jonas

Huling-huli ko sa akto ang panloloko sa akin ni Estella, nakita ko sila ng kanyang lalaki na magkaholding hands pa at masayang naglalakad. Sinita ko siya. Itinanggi pa ni Estella na magkasintahan kami gayon sinagot na niya ako dalawang buwan na ang nakaraan.

“Ikaw ha, komo’t binasted kita ay gusto mo pa kaming paghiwalayin ng nobyo ko. Umalis ka nga diyan! Bwisit na to,” pasigaw niyang wika sa akin, tahimik lang ang lalaki at walang sinabi. Pinagtitinginan na kami ng mga tao

Galit na galit talaga ako sa babaeng iyon. “Two timer! Cheater! Mag-ingat ka lalaki ka, dahil kung nagawa niya akong pagtaksilan, kaya din niyang gawin sa iyo iyan!” Ang aking nasabi bago ako mabilis na umalis sa lugar na iyon.

Hindi na ako nakipagtalo pa sa dalawang taksil na iyon dahil sa nakita ko si JM na nakatingin sa lugar namin, hindi naman kalayuan ang agwat namin kung saan siya naroroon at alam kong alam niya ang kaganapan at nadinig pa ang pagtatalo namin ni Estella. Napahiya ako sa kanya kaya umalis na lang ako at magkukunwari na hindi ko siya nakita.

Nung gabing iyon ay gusto kong puntahan na si JM para mag-apologize. Papunta na sana ako sa bahay nila ng mag-ring ang aking CP. Tumatawag sa messenger sa akin si Estella.

“Pwede bang mag-usap tayo?” wika niya.

“Bakit hindi mo pa sabihin sa akin dito ang sasabihin mo!” tugon ko.

“Ayokong dito tayo sa phone nag-uusap, gusto kong kaharap ka. Please, magkita tayo dito, hihintayin kita.” Wika niya na sinabi kung saan siya naroroon.

Nakipagkita naman ako sa babaeng iyon. Humihingi siya ng tawag at sinabing kami ra raw uli. Nakipag-break na raw siya sa lalaking iyon. Itinanggi lang daw niya ang aming relasyon sa akin dahil sa baka magwala raw ang lalaki at masaktan ako. Iniwas lang daw ko sa away.

Hindi naman ako naniniwala sa sinabi niya, pero pumayag naman ako. Gusto ko lang malaman ang reaksyon ni JM kapag nakita nito na magkasama kami uli ni Estella, gusto ko siyang pikunin, asarin. Naiinis kasi ako sa kanya, hindi man lang niya ako sinundan para aluin sa aking pagdaramdam dahil nasaktan ako ng isang babae.

Hindi naman kasi ako lumayo kaagad, sinilip ko pa siya, hinihintay na sundan ako, pero bigo ako. Nakita ko siyang umalis na. Nainis ako sa aking sarili, inis din ako kay JM. Kasi tila wala siyang pakialam sa nangyari gayong nasaksihan at narinig niya ang nangyari.

Sana man lang ay dinamayan ako kung itinuturing pa niyang kaibigan ako. Gusto ko nang makipagbati kay JM, nami-miss ko na siya. Kapag bati na kami ay saka ko naman ibe-break ang babaeng ito.

Sigurado akong magkukuwento si JM sa mga kaibigan namin sa nangyari, kapag namangha siya, maiinis iyon, kakausapin ako at pagsasabihan. Alam kong may care pa rin ito sa akin bilang bestfriend nito.

 

Itutuloy………………