Nasibak Ni Insan Dos (Part 41) By: Firemaker JD

 

Nasibak Ni Insan Dos (Part 41)

By: Firemaker JD

"Okay ka na ba?" paulit-ulit na tanong ng dalaga. Tango lang naman ng tango si Jude habang patuloy ang paginom ng tubig. Ngunit nanlaki ang kanyang mata nang masulyapan niya kung sino ang kasama ng kanyang pinsang si Lucas, sina Jed at Mac. Nakangiti silang pumapasok sa gate ng bahay ng kanilang kamag-anak. Hindi makahinga si Jude. Ramdam niyang pumapasok ang iniinom niyang tubig sa kanyang baga.

"Anak ng pitong puting tupa!" sa isip ni Jude at muli siyang nasamid. Mas grabeng ubo ang kanyang nagawa dahil sa dami ng nainom. Para talaga siyang nalunod. Yumuko si Jude at patuloy na umuubo.

"Kuya, okay ka lang ba?" si Chuchay na nag-aalala. Narinig naman iyon ni Lucas kung kaya agad rin siyang tumakbo papunta sa mesa nila Jude at naiwan ang dalawang bisita sa isang tabi.

"Insan, okay ka lang?" si Lucas sabay tapik sa likuran ng nakayukong si Jude.

"Yes, okay lang ako," hinahabol na hininga na sagot ni Jude. Nakayuko pa rin ito habang inaalo ng mga taong nakapaligid sa kanya.

"No, hindi ako okay! Paanong nandito si Mac? Anong ginagawa niya rito? Paano nakilala ng pinsan ang dalawang kaeskwela? Putangina! Paano? Bakit?" sunud-sunod na tanong ni Jude sa kanyang isipan.

-----o0o-----

"Hello!" bati ng transwoman na si Karla sa dalawang binatang kasama ni Lucas. Kasama niyang sumalubong ang kaibigang si Lyka. Ngumiti ang isang binata habang isa naman ay tumango lang. Hindi man lang ngumiti ang binata at mabilis na binawi ang tingin sa kanila upang pagmasdan ang paligid sa oras na iyon.

"Sungit naman nung isa!" bulong ni Lyka sa kaibigan.

"Shh! Ganyan talaga ang mga taga-Maynila. Tignan mo parang ngayon lang nakakita ng ganitong piging," sagot na pabulong ni Karla at pigil na pagtawa habang pinagmamasdan ang reaksyon ng isang binata.

"Kaibigan kayo ni Lucas?" muling baling ni Karla sa dalawang bisita.

"Yes. We're friends of Lucas. By the way, my name is Jed and this is my friend, Mac," nakangiting bati ni Jed sa dalawang babae at kanyang inabot ang kanyang palad upang kamayan ang mga ito.

"Karla nga pala. Heto naman si Lyka, friend ko rin," sagot ni Karla sa lalaki. Hindi inabot ni Karla ang kamay ng lalaki kundi bineso-beso nito si Jed.

"Nice to meet you," napangiting sagot ni Jed. Medyo nagulat siya sa ginawa ng babae pero hinayaan niya lang iyon.

"Sorry sa friend ko," nahihiyang sabi ni Lyka sa bisita sabay abot ng kanyang kamay upang kamayan si Jed. Nakangiting umiling lang ang binata at tila ba sinasabi na okay lang. Imbes na kamay ang inabot ni Jed ay siya ang bumeso-beso sa dalaga.

Samantala walang hiya-hiyang bumaling si Karla sa hindi nakatinging si Mac. Hinawakan ni Karla ang dalawang matigas na braso ng binata at kanyang inabot ang mga pisngi nito upang sa kanya namang bumeso. Nagulat si Mac at walang nagawa ito kundi ilapit ang kanyang mukha sa babae.

"Welcome sa Legaspi," bati ng babae nang maglapat ang kanilang mga pisngi. "Sa-sa-salamat," tanging sagot ni Mac at agad rin namang kumawala sa paghawak sa kanya ni Karla matapos magbeso sa kanyang dalawang pisngi.

"Friend, kalma," sabi ni Lyka sabay kurot sa tagiliran ng kaibigan.

"Ouch!" malanding sambit ng babae.

"Sorry sa friend ko," nahihiyang sabi ni Lyka sa isang lalaki. Madamot na ngiti lang ang sinagot ni Mac sa kasama ng transwoman.

Agad naman sumingit si Jed. "By the way, may dala pala kame. I hope umiinom kayo nito," si Jed sabay kuha kay Mac ng mga dalang alak.

"Oh yes! Yes. We can drink this." pa-English na sagot ni Karla.

"Halika, doon kayo sa table namin," yaya ni Karla sa dalawang bisita.

"No!" agad na sabi ni Mac. "We will be waiting for Lucas." dagdag pa niya.

"Yes! We are with… We are with Lucas," sagot ni Karla sabay turo sa kaibigan na dinadamayan ang nasamid na si Jude. "There, oh!" sabi pa ni Karla.

"Hoy, Karla! Tinarget mo na naman yang mga kaibigan ni Lucas?" nang-aasar na sabi ni Isagani sa kaibigan ng kapatid.

"Excuse me, Kuya Gani! Inaasikaso nga namin at iniwan yan ni Lucas dito," sagot ng babae kay Isagani.

"Pagpasensyahan niyo na itong si Karla. Welcome, mga sir. Isagani ho nga pala, kuya ni Lucas," bati ni Isagani sabay kamay sa dalawang binata. Inuna niyang kamayan si Mac, sumunod si Jed. Biglang may dumaloy na kuryente nang magdikit ang mga palad ni Isagani at ni Jed. Mainit itong dumaloy sa buong katawan ng dalawang lalaki. Ngumiti si Isagani sa kaibigan ng kapatid, malagkit ang mga tingin, may ibig sabihin, my landi. Nailang naman si Jed at agad niyang binawi ang kamay mula sa kapatid ni Lucas.

"Thank you, po," pilit na ngiting sagot ni Jed.

"Hatid muna  ninyo ang mga ito kay Lucas," bilin ni Isagani sa dalawa.

"Teka, pakuhain na muna natin sila ng pagkain," wika ni Lyka na tumabi kay Mac.

"Sige, kumuha na muna tayo ng foods,." pagsang-ayon ni Karla. Tumango lang ang dalawang binata at sinundan ang mga bagong kakilala sa lamesa ng mga handa.

"Wow! Grabe ang daming pagkain," manghang sabi ni Jed. Nakalatag kasi ang iba't ibang putahe, mga lutong-ulam, lechon, panghimagas at may basket na puno ng prutas.

"Yes, ganito talaga kame dito sa Bicol," sagot ni Karla.

"Taga-saan pala kayo?" si Lyka kay Mac.

"Manila," maikling sagot ni Mac sabay sandok ng ulam.

"Ahhh," tanging sagot ni Lyka sabay tingin kay Karla. Medyo nag-make face pa ito sa kaibigan.

"So, paano nga kayo nagkakakilala ni Lucas?" tanong ni Karla kay Jed.

"Sa The Oriental kame nag-stay. Doon namin nakilala si Lucas," sagot naman ni Jed habang sumasandok rin ng mga ulam.

"Wow! Big time naman pala kayo," manghang sabi ni Karla.

"Hindi ako yung big time. Itong kaibigan ko ang big time," pabirong sagot ni Jed sabay akbay kay Mac. Pero wala itong kibo at patuloy na kumukuha ng ulam.

-----o0o-----

"Ano, okay ka na ba?" nag-aalalang tanong ni Lucas sa pinsan habang tinatapik ang likuran ni Jude.

"Oo. Okay na ako," tugon ni Jude habang inuubo-ubo pa ng kaunti. Marahang sinilip ni Jude kung saan nagpunta ang dalawang kaklase. Pinagpapawisan siya ng malamig, kinakabahan. Ramdam niya rin ang pagbilis ng tibok ng kanyang puso. "Shit!" alalang bulong ni Jude sa kanyang sarili nang makita niya na kasama na ng mga kababata sina Mac.

Mas bumilis ang kanyang paghinga. Hindi pa siya handang makaharap ang dating kasintahan. Kailangan niyang makatakas sa lugar na iyon. Kailangan niyang iwasan ang presensya ng binata. Kailangan niyang lumayo kay Mac lalo na ngayong tuluyan nang pumasok si Ace sa eksena.

"Excuse, magbabanyo lang ako," mabilis na paalam ni Jude sa mga kasama.

"Samahan na kita," alok ni Lucas sa pinsan.

"Huwag na. Kaya ko na," mabilis na sagot ni Jude. Agad siyang tumayo sa kinauupuan at mabilis na naglakad papasok sa bahay ng mga kamag-anak.

"Anong nangyari sa kuya mo?" tanong ni Lucas sa pinsan na si Chuchay.

"Ewan ko. Nasamid lang naman siya nung pagdating ninyo e," sagot ni Chuchay.

"Hoy, Lucas! Bakit mo naman iniwan itong mga bisita mo?" singit ni Karla kasama ang dalawang bagong mukha.

"Sorry, si insan kasi nasamid," sagot ni Lucas sabay lapit sa dalawang bagong kaibigan.

"Buti na lang napaka-hospitable ko," biro ni Karla.

"Thank you, ma'am," sagot ni Lucas sabay pisil sa pisngi ng kaibigan. "By the way, guys, mga bago kong kaibigan, si Jed at si Mac nga pala," pakilala ni Lucas sa mga bisita sa mga kasama sa mesa.

"Hello, guys," nakangiting bati ni Jed habang tipid na ngiti at tango lang ng ulo ang binigay ni Mac sa grupo.

Pinaupo na ni Lucas ang dalawa sa kanilang mesa. "Syempre, kilala niyo na sina Karla at Lyka. Mga kaklase ko yan nung highschool. Ito si Benjie, kaklase ko rin," pakilala naman ni Lucas sa mga nasa mesa. "Ito si Chuchay, pinsan ko, syota niyang si Denver. Nasa banyo pa yung isa kong pinsan," dagdag pa ni Lucas.

"Oh speaking of banyo, Lucas, pwede bang makigamit ng washroom?" paalam ni Mac sa kaibigan.

"Ah sige, samahan na kita," aya ni Lucas.

"No, it's okay. Turo mo na lang," sagot ni Mac.

"Nasa looban pa yun e," sagot ni Lucas.

"Ako na lang ang sasama. Sunduin ko na rin si kuya," prisinta ni Chuchay.

-----o0o-----

Naghilamos si Jude sa lababo upang mahimasmasan. Ramdam niya kasi ang init ng kanyang magkabilang pisngi, namumula ang mga ito. Tiningnan niya ang kanyang sarili sa salamin. Huminga ng napakalalim ang binata. "Ano ba kasing ginagawa mo rito? Bakit ka ba narito?" naguguluhang tanong ni Jude sa sariling repleksyon. Ngunit bigla siyang napatigil at muling inalala ang itsura ng dating kasintahan habang papasok ito kasama ang kanyang pinsan. Hindi talaga maitatanggi ang kagwapuhan ni Mac lalo na sa kanyang porma ngayong gabi. Long-sleeve na polo at pantalon na fit na fit sa kanya. Sinamahan pa ng maamong mukha ng dating nobyo. Nakaayos din ang buhok nito at halata na bagong shave. Mukhang aakyat ng ligaw ang loko.

Hindi man niya aminin ay na-miss niyang pagmasdan ang kagwapuhan ni Mac. Ilang araw na rin niyang hindi nakikita ang dating nobyo. Nanlaki ang kanyang mata ng muli niyang naalala ang pabangong naamoy kanina sa simbahan ng Daraga at sa Cagsawa Ruins. Ngayon, sigurado na siya na si Mac talaga iyon. Napahawak si Jude sa kanyang dibdib. Bumilis na naman ang kabog sa kanyang dibdib. Hindi niya maintindihan kung kaba ba ang kanyang nararamdaman o kilig dahil sa presensya ni Mac. "Umaayos ka, Jude!" seryosong bilin ni Jude sa kanyang sarili. "Hindi ba dapat galit ka kay Mac? Nakalimutan mo na ba ang mga sinabi ng lalaking iyon sa iyo? Nakakadiri ka daw. Nakakasuka!" sambit pa ni Jude sa kanyang repleksyon. "Hindi pa nga nagso-sorry yan sa iyo!" dagdag pa niya.

"Pero ‘di ba may kasalanan ka rin kay Mac? ‘Di ba magagalit ka rin naman kapag nalaman mong may nakatalik siyang iba?" buwelta naman ni Jude sa sarili.

"Malay mo, kaya nandito si Mac dahil hihingi na siya ng tawad. At sasabihin na mahal ka pa rin niya kahit na may nagawa kang mali," sagot niya sa sarili.

"Pero, pa

Doon napatigil si Jude at muling tinitigan ang repleksyon sa salamin. Tama nga naman. Paano na si Ace? May nararamdaman na ba siya kay Ace? Napahawak si Jude sa kanyang dibdib. Kinapa ang suot na kwintas na binigay ng binata. Huminga siya ng malalim. Kinuha niya ang kanyang telepono mula sa kanyang bulsa. Hindi nga siya nagkamali at may dalawang message galing kay Ace. Marahan niyang binuksan ang mga ito. Dalawang selfie ng binata na may caption na, "Miss na kita agad. Balik na ako dyan?" Biglang kumatok ang kanyang konsensya. Napakagat ng labi si Jude. Mas lalo siyang nalito sa nararamdaman.

"Kuya, nandyan ka ba?" sigaw ni Chuchay habang kinakatok ang pinto ng banyo.

Walang sagot mula sa loob pero nakalock ito. "Kuya! May gagamit ng banyo. Matagal ka pa ba diyan?" ulit ng dalagita.

"Oo! Matagal pa ako dito! Doon ka sa labas mag-CR!" naiinis na sagot ni Jude sa kapatid. Sa totoo lang, ayaw niya na talagang lumabas ng banyo dahil ayaw niyang harapin ang dalawang kaklase.

"Ano ka ba? Nakakahiya!!" sagot ni Chuchay habang padabog na kinakatok ang pinto.

"No, it's okay. Iihi lang naman ako. Saan ba yung banyo sa labas?" singit ni Mac sa pinsan ng kaibigan.

"Nako, kuya, huwag. Nakakahiya," sagot ni Chuchay sa bisita.

"Okay lang. Nakatayo naman akong umihi e. May flush naman dun?" naiilang na tanong ni Mac.

"May drum naman ng tubig doon," naiilang na sagot ni Chuchay.

"Okay na ako dun. Ihing-ihi na talaga ako e," sabi ni Mac.

"Sige," atubiling sagot ng dalagita.

Naunang pumunta sa likuran ng bahay si Chuchay kasunod si Mac. Naamoy agad ni Mac ang simoy ng mga alagang hayop ng pamilya ni Lucas. Medyo naduduwal siya dahil hindi talaga siya sanay.

Binuksan ni Chuchay ang pintong yero at sinindihan ang light bulb. "Kuya, okay lang ba?" alalang tanong ng dalagita.

Tumango lang si Mac at ngumiti. Agad niyang pinigilan ang paghinga. Sinara ang pinto at agad na binaba ang siper ng pantalon upang makaihi na.

-----o0o-----

Huminga ng malalim si Jude at napagdesisyunan niyang hindi harapin si Mac sa gabing ito. Hindi pa siya handa. Hindi pa niya alam kung paano kakausapin ang dating nobyo. Inayos ni Jude ang sarili at agad niyang pinunasan ang bagong hilamos na mukha. Lumabas na ang binata ng banyo upang papasukin ang kapatid ngunit wala na si Chuchay sa labas ng banyo. Plano niyang umuwi na sa oras na iyon at sa likod na siya dadaan upang makatakas. Dumiretso si Jude sa kusina at laking gulat niya na naroon ang kapatid.

"Kuya! Buti naman at natapos ka na sa banyo. Ano bang ginawa mo?" tanong ni Chuchay.

"Biglang sumakit tiyan ko. Uuwi na ako," pagsisinungaling ni Jude sa kapatid.

"Ha? Ano bang kinain mo? Pahatid na kaya kita kay Denver? Baka maabutan ka pa sa kalsada," alalang sambit ni Chuchay sa kanyang kuya. "Teka tawagin ko lang si Denver," sabi pa ng dalagita bago iwan si Jude.

Iniisip ni Jude na mas mapapabilis ang kanyang pagtakas sa lugar na ito kung ihahatid siya ng kasintahan ng kapatid gamit ang motor. Pumwesto siya sa likod ng kurtina upang silipin kung nasaan ang dalawang kaklase ngunit hindi niya maaninag ang mga ito mula sa kanyang pwesto.

Muling pumasok si Mac sa kusina matapos niyang gumamit ng banyo. Agad niyang napansin ang isang nakatalikod na lalaki na tila ba may sinisilip sa labas. Napakunot ng noo si Mac nang mamasdan niyang parang pamilyar ang bulto ng lalaking nasa likod ng mga kurtina mula sa buhok nito, batok at likuran. Naka-polo shirt ang binata, naka-shorts na maong at tsinelas lang ito.. Napalunok pa siya nang mapadako ang kanyang tingin sa pwetan ng binata. Matambok ito. Pamilyar na pamilyar ito sa kanya.

"Jude?" sa isip ni Mac. Bigla siyang kinabahan. Hindi siya makapaniwala na nasa kanyang harapan na ang dating kasintahan. Marahan siyang lumapit rito at pumwesto sa likuran ni Jude. Kumpirmado agad ni Mac na ang dating nobyo ang kanyang nasa harapan dahil naamoy niya ang cologne ni Jude. Napangiti siya. Gusto na niyang yakapin si Jude sa oras na iyon. Gusto na niyang ikulong sa kanyang mga bisig ang dating nobyo. Huminga ng malalim si Mac at mas lalo itong lumapit sa nakatalikod na si Jude.

"Anong meron?" pabirong tanong ni Mac.

"Wala. Sinisilip ko lang yung mga bisita ni Lucas," casual na sagot ni Jude.

"Sino ba yung mga bisita ni Lucas?" pagpatol ni Mac sa sitwasyon. Mas nilapit pa niya ang kanyang katawan sa katawan ni Jude. Mas nilanghap niya ang amoy ng dating kasintahan. Ramdam na rin niya ang init ng katawan ng nasa harapan niya.

Medyo natauhan si Jude sa kanilang pwesto ng usisero. Naramdaman niya ang buga ng hininga nito sa banda ng kanyang tenga. Pati ang matigas nitong dibdib sa kanyang likuran. Naramdaman rin niya kasing tumatama ang pundilyo nito sa kanyang pwetan. Medyo naiilang siya sa kanilang pwesto at baka may makakitang kakilala. Napakunot ang noo si Jude at agad na hinarap ang taong na nasa kanyang likuran. Nanlaki ang mga mata ni Jude nang malaman kung sino ito. Tila tumigil ang pintig ng kanyang puso.

"A-a-anong ginagawa mo rito?" nauutal na tanong ni Jude nang mahimasmasan siya.

"Ah. We-we-we were invited by Lucas," nauutal pang sagot ni Mac sa dating nobyo.

"I mean, anong ginagawa mo dito sa Bicol?" paglilinaw ni Jude sa kanyang tanong.

Hindi makasagot si Mac. Hindi niya alam kung paano sasagutin ang tanong ng dating kasintahan. Napalunok si Mac at napakamot lang sa kanyang noo.

Napailing naman si Jude nang hindi makasagot si Mac sa kanyang tanong. "Bakit ka ba nandito? Ha?" mas seryosong tanong ni Jude. Naiinis siya sa binata.

Hindi pa rin sumasagot si Mac. Dahil nakita na rin naman siya ng kanyang tinataguan ay nauna na siyang lumabas ng kusina.

"Oh Kuya Jude, halika na. Ihahatid ko daw po kayo sabi ni Chuchay?" salubong ni Denver sa kapatid ng nobya.

"Hindi, okay na," maikling sagot ni Jude.

"Okay na, dude. Ako na maghahatid sa kanya," singit ni Mac na lumabas rin ng kusina.

"Ma-ma-magkakilala kayo?" nagtatakang tanong ni Denver sa dalawa.

Walang sumagot sa dalawang binata sa tanong ni Denver. Dumiretso si Jude sa kanilang mesa at umupo sa kanyang pwesto.

"Ju-ju-jude!" laking gulat ni Jed nang makita ang kaklase at agad na hinanap si Mac.

"Hi, Jed," simpleng sagot ni Jude.

"Kakilala mo siya?" nalilitong tanong ni Lucas sa bagong kaibigan.

"Na-na-nagkita na kayo ni Mac?" nae-excite na tanong ni Jed.

Tumango lang si Jude at kasabay nito ay ang pagdating rin nina Mac at Denver mula sa loob ng bahay.

"Magkakakilala kayo?" ulit na tanong ni Karla. Nakatingin ito kay Jude na tila ba naghihintay ng sagot sa kakabata.

"Mga kaklase ko yan sa Maynila," napilitang sagot ni Jude sa mga kasama.

Lahat sila’y nagulat sa nalaman.

"Kuya, bakit ang gwagwapo ng mga kaklase mo?" taklesang tanong ni Chuchay sa kapatid. Hindi pa rin siya makapaniwala na mayroon na naman kakilala ang kuya na pumunta sa kanilang lugar.

"E gwapo naman ang kuya mo a," biglang sagot ni Mac sabay upo sa harapan ni Jude. Mula sa seryosong mukha kanina ay todo ang ngiti na ni Mac sa oras na iyon. Mas lalo tuloy lumabas ang kagwapuhan ng binata.

"Parang ang sarap na mag-aral sa Maynila kung ganito ba naman ang mga kaklase mo," pabirong sabi ni Karla. Nagsitawanan naman ang mga kasama nila sa mesa maliban kay Jude.

"Uy, may pa-disco daw sa plaza," biglang sambit ni Karla sa mga kasama sa mesa matapos magbasa ng kanyang telepono. "Punta tayooooo," dagdag pa ng babae sa mga kaibigan. Saktong tapos na rin kumain ang lahat at nagpapababa na lang ng kinain.

"Game ako dyan," agad na sagot ni Jed sa mga kasama.

"Yan! Perfect," sagot ni Karla.

"Ikaw ba, Mac?" baling ni Jed sa kaibigan.

"Pupunta ka ba, Jude?" tanong naman ni Mac sa dating nobyo. Hindi sumagot si Jude.

"Sige na, kuya. Punta na tayo. Malamang sa pyesta na ang susunod na pa-disco ni Mayor." hiling ni Chuchay sa kapatid.

"Oo nga! Dati rati, rampa agad tayo sa diskuhan. Kaya tigil-tigilan mo ako sa pag-iinarte mo," singit ni Karla sa kababata.

"Oo nga, insan. Punta na tayo para ma-experience nila Jed ang disco sa atin," si Lucas.

"Okay, okay! Sasama na ako," may inis na sagot ni Jude sa mga kasama.

"Yown!" sabay-sabay na sambit ng mga naroon.

"Magpapaalam lang ako kina Inay," sambit ni Lucas sa mga kasamahan sabay tayo ang binata.

"Kuya, kay Denver na ako aangkas papuntang plaza ah," paalam ni Chuchay sa kapatid.

"Okay. Magta-tricycle na lang kame nila Karla," sagot ni Jude.

"Hala! May owner naman si Lucas. Doon na kame sasabay nila Lyka," sagot ni Karla.

"Ha?  Kakasya pa ba ako doon?" sagot ni Jude sa mga kaibigan.

"May dalang kotse si Mac," singit ni Jed sa usapan.

"Yeah. Sa akin ka na sumakay," prisinta ni Mac ngunit natigilan ang lahat dahil iba ang pagkakasambit nito.

Nanlaki rin ang mata ni Jude dahil iba rin ang pagkakaintindi niya sa sinabi ng dating nobyo. Si Karla ang unang tumawa. "Grabe naman! Pwede bang ako nalang ang sumakay sa iyo, Mac?" malanding sambit ng babae.

"No, I mean sa kotse ko," namumulang bawi ni Mac sabay tingin sa pwesto ni Jude.

"Hindi, kay Lucas na lang ako sasabay," mabilis na sagot ni Jude sa alok ng dating nobyo.

"Halika na," yaya ni Lucas sa mga kasama nang bumalik siya sa kanilang mesa.

"Insan, sa iyo ako sasabay ah," agad na sinabi ni Jude kay Lucas.

"Sige. Kasya pa naman e," sagot ni Lucas.

"Ah sige kay Mac na lang ako sasabay," singit ni Jed.

"Hindi, sa akin ka na," agad ring sabi ni Lucas.

"It's okay, bro. Wala rin kasabay si Mac sa kotse," sagot rin ni Jed. Hindi na umimik si Mac at tumuloy na lang ito sa kanyang nirentahang kotse.

-----o0o-----

"Hindi ba kayo close nila Mac?" biglang tanong ni Lyka kay Jude habang binabaybay nila ang daan papuntang plaza. Nasa tabi ng nagmamanehong si Lucas ang pinsan niyang si Jude habang ang tatlong kababata ay nasa likuran ng owner.

"Bakit mo naman gustong malaman, aber, Lyka?" singit ni Karla.

"Hindi! Kanina ko pa kasi napapansin si Mac na panay ang tingin kay Jude," kwento ni Lyka sa mga kasama.

Napangiti lang ng mapakla si Jude sa kanyang upuan. "Baka nagkakataon lang," sagot ni Jude sa kaibigan.

"Nagkataon? Titig na titig e," sagot ni Lyka.

"Natural. Nagulat yun. Sa laki ba naman ng Pilipinas ay nagtagpo sila ni Jude dito sa Bicol," si Lucas ang sumagot.

"Pero infairness, Jude. Ang gu-gwapo ng mga kaeskwela mo," singit ni Karla.

"Oo, may dalawa pa ngang kasama yan. Hindi ko lang alam kung bakit hindi nakasama. Baka napagod kanina sa tour," sambit ni Lucas. Napatingin si Jude sa pinsan.

"Apat sila na nandito? Anong mga pangalan ng kasama nila?" usisa ni Jude. Medyo nainis siya nang malaman na may kasama pa ang dating nobyo maliban kay Jed. Pumasok agad sa kanyang isip ang kaklaseng si Migs.

"Oo. Mga kaibigan rin nila Jed e. Sina Migs at Nico, kilala mo rin?" casual na sagot at tanong ni Lucas.

Biglang bumagsak ang balikat ni Jude mang marinig ang pangalan ni Migs. "Hanggang dito ba naman?" sa isip ni Jude.

"Puro gwapo rin?" singit ni Karla.

"May mga itsura naman," simpleng sagot ni Lucas.

"Oh my gooodness!" may kilig na tili ng transwoman.

"Ang harot mo!" natatawang komento ni Benjie sa dating kaklase.

"Benjie, hayaan mo na ako. Ngayon lang ako makakatikim ng taga-Manila," malanding sambit ni Karla.

"Friend, sa tingin mo ba, maakit sila ng boobsie ko?" baling ni Karla sa kaibigan. Napalitan ng tawa ang kaninang inis na nararamdaman ni Jude.

"Subukan mo mamaya," pabirong sabi ni Jude sa kaibigan.

"Akala mo naman, ang laki-laki niyan," si Lyka. Sumali na rin ang dalaga sa pang-aasar kay Karla.

"Ayan! Sige! Pagtulungan ninyo ako! Mga wala kayong suporta!" nagtatampong sabi ng transwoman.

"Si Denver na nga lang ang pipikutin ko," biglang sambit ni Karla.

"Hoy, subukan mo! Boyfriend yun ng kapatid ko!" si Jude na agad na napalingon sa likuran.

"Syempre, joke lang! Ang seryoso mo naman," sagot ni Karla na nag-peace sign pa sa kaibigan.

"Dapat lang, Karla. Ako ang makakaharap mo kapag nasaktan yang kapatid ko," seryosong banta ni Jude sa kababata.

"Oo na! Kay Jed na lang, mukhang mas bibigay yun kaysa kay Mac," baling ni Karla.

"Asa," mahinang sambit ni Lucas.

"Ano?" sabay-sabay na sambit ng apat.

Kahit na mahina ay narinig nila ang sinabi ni Lucas. Napakunot tuloy ang noo ni Jude mula sa komento ng pinsan.

"Wala!" sagot ni Lucas na nagpatuloy sa pagmamaneho.

 

 

Susundan……